जनप्रतिसाद न्यूज नेटवर्क
(अनिल जोशी)
राष्ट्रवादी काँग्रेसचे अध्यक्ष शरद पवार हे दि. 25 ऑगस्ट 2023 रोजी, कोल्हापूर दौऱ्यावर येत असून,दसरा चौकात त्यांची जाहीर सभा होणार आहे.राष्ट्रवादी काँग्रेसचे अध्यक्ष शरद पवार हे पुन्हा एकदा पक्ष बांधणीसाठी आखाड्यात उतरले असून,बंडखोर आमदारांचा मतदारसंघ पिंजून काढण्याच्या तयारीत असल्याचे समजते. कोल्हापुरातील दसरा चौकात, राष्ट्रवादी काँग्रेसचे अध्यक्ष शरद पवार यांची 25 ऑगस्ट 2023 रोजी सायंकाळी 4:00 वाजता जाहीर सभा होणार आहे. सभेच्या अध्यक्षस्थानी श्रीमंत शाहू छत्रपती महाराज असतील.
प्रथेप्रमाणे सुरुवातीस, कोल्हापूर राष्ट्रवादी काँग्रेस पदाधिकाऱ्यांच्या व कार्यकर्त्यांच्या कडून एक बाईक रॅली निघणार असून, रॅलीमधून राष्ट्रवादी काँग्रेसचे अध्यक्ष शरद पवार यांचे जोरदार स्वागत करण्याची तयारी करण्यात आली आहे. सध्या कोल्हापुरातील बंडखोर आमदारांच्या विरुद्ध, राष्ट्रवादी काँग्रेसचे अध्यक्ष शरद पवार जोरदार रणशिंग फुंकण्याची चिन्हे दिसत असून, याची सर्वत्र चर्चा होत आहे. दरम्यान उपमुख्यमंत्री अजित पवार यांच्याबरोबर गेलेल्या शिक्षण मंत्री आमदार हसन मुश्रीफ यांच्या विरोधात, राष्ट्रवादी काँग्रेसचे अध्यक्ष शरद पवार काय भूमिका घेतात? हा एक मोठा औत्सुक्याचा विषय व राजकीय दृष्ट्या चर्चेचा विषय झाला आहे. कोल्हापुरातील दसरा चौकातील होणाऱ्या सभेस राष्ट्रवादी काँग्रेसचे प्रदेशाध्यक्ष जयंत पाटील, साताऱ्याचे खासदार श्रीनिवास पाटील, आमदार बाळासाहेब पाटील आदि मान्यवर उपस्थित राहणार आहेत.
